Thoma Strakosha është kthyer në një pikë referimi për Lazion këtë sezon. Garancia që ai i sjell ekipit në prapavijë u jep atyre mundësi që të shprehen më mirë në sulm. Këtë e ka konfirmuar “La Gazzeta Dello Sport” duke thënë se portieri shqiptar është me të vërtet në nivelet e tij më të larta si me Lazio ashtu edhe me Shqipërinë, madje thekson se i ka zënë vendin e titullarit një portieri si Etri Berisha.
“Në sezonin e dytë si titullar te Lazio është një siguri më shumë për Simone Inzaghi. Trajneri i bardh e kaltërve vendosi ta mbajë titullar në dy ndeshjet ndaj Marseille dhe Strakosha u tregua përcaktues në kualifikimin për në 16-she të Europa League”, shkruan gazeta italiane.
Ndër të tjera gazeta shkruan se Strakosha ka rritur minutazhin e tij në Kombëtare duke zënë vend si titullar te Shqipëria që prej debutimit të tij në mars të vitit 2017.
Leksione dhe këshilla – “Strakosha po provon se është gjithnjë e më shumë i rëndësishëm në rezultatet e Lazio. Dimensioni i tij i rritjes vijon edhe në nivel ndërkombëtar. Por, përgatitësi i tij te Lazio, Grisons po punon për ta bërë atë edhe më të mirë. Sidomos në daljet e tij nga porta, që konsiderohen si një pikë e dobët e tij. Ai ka karakter të fortë dhe dëshirë të madhe për të bërë progres në interpretimin e rolit të tij, gjithashtu duke ndjekur këshillat e babit të tij, Fotos, i cili ka qenë portier i Shqipërisë gjithashtu”, analizoi më tej “La Gazzetta”.
