Nga Mentor Kikia/ Ja çfarë lexoi para Parlamentit Evropian një politikane e çmendur. Duhet të jetë vërtet e çmendur. Eleni Theocharous, eurodeputete qipriote, si rrallë ndonjëherë një politikan në një forum evropian, gënjen në mënyrën më të pacipë. Shpif në mënyrën më të paturpshme.
“Qeveria shqiptare më shpalli person të padëshirueshëm, sepse mbroj të drejtat e njeriut të pakicës greke, të cilat janë shkelur nga regjimi shqiptar, dhe që jetojnë në një klimë terrorizmi dhe spastrimi të heshtur. Të drejtat e grekëve janë shkelur nga shteti shqiptar përmes frikësimit, ndërsa të drejtat e tyre arsimore dhe përdorimi i gjuhës greke janë të persekutuar sistematikisht. Disa ditë më parë shqiptarët vranë Konstandinos Kacifa sepse ngriti flamurin grek”.
Kacifas, moj zonjë, nuk u vra sepse ngriti flamurin grek në fshatin e tij të lindjes, pasi Bularati, nuk kishte asnjë gur të pambuluar me flamuj grekë, dhe këtë e patë edhe ju vetë atë ditë, ndërsa thërrisnit kundër shqiptarëve, si një ekstremiste ordinere. Kacifas, në vend të flamurit, mbante në dorë një automatik dhe qëllonte në tym, dhe Zoti deshi që të mos kishte të vrarë as nga banorët e fshatit, as nga policia.
Grekë dhe shqiptarë, jetojnë paqësisht në Shqipëri. Këtë e dimë të gjithë ne. E dinë më mirë se ne, vetë minoritarët grekë. E dinë edhe përfaqësuesit politikë të tyre në Tiranë, të cilët bëjnë denoncime për shkeljen e të drejtave të grekëve minoritarë vetëm kur u vjen ndonjë telegram nga Athina. Dhe jo më kot, në debatin për të drejtat e minoriteteve që do të mbahet në 28 Nëntor, në kuadër të progres raportit, nuk flitet për minoritetin grek, por për romët, që janë realisht të diskriminuar në Shqipëri, në çdo drejtim.
Na lini të jetojmë të qetë, pasi hallin nuk e kemi me njëri tjetrin, por të gjithë bashkë, shqiptarë dhe grekët që jetojnë në Shqipëri, kemi një halla më të madh. Kemi varfërinë dhe korrupsionin, klasën politike të kalbur dhe qeverisjet që sa vijnë e rëndojnë dorën në të vjedhur. Këtë po, e vuajmë si grekë edhe shqiptarë, dhe po na bëjnë tgë marrim udhët e botës. Nëse atje, në atë parlament, luftoni të na çlironi nga kjo skllavëri, atëherë bëjeni. Por mos ndizni zjarre, mos i jepni armë vlugut të shoqërisë greke, që mendon se Gjirokastra është e pushtuar nga shqiptarët, pasi nuk dinë as histori e as gjeografi.
Atij parlamenti duhet i vijë turp që ka brenda të tillë politikanë!
