Sot u mbajt mbledhja e radhës e Komisionit Hetimor për shkarkimin e presidentit Ilir Meta. Kryetari i Komisionit Hetimor për shkarkimin e presidentit Meta, Alket Hyseni, tha në nisje të seancës që Meta nuk do të jetë i pranishëm. Ai lexoi disa pjesë nga shkresa që Meta dorëzoi pak minuta para se Komisioni të fillonte. Më tej, propozoi që Metës ti lihet një hapësirë zgjedhje, mes ditëve nga e nesërmja deri të hënën për tu paraqitur në Komision.
Sakaq, anëtari i Komisionit Spartak Braho, kërkoi arsyen për mungesën e presidentit, ndërsa shtoi: “Nëse Meta nuk njeh legjitimitetin e Kuvendit, ky është puç”. Deputeti Spartak Braho ka kërkuar të dije se përse Meta nuk ishte i pranishëm në mbledhjen e ditës së sotme. Ai është shprehur se nëse presidenti nuk njeh legjitimitetin e Kuvendit, atëherë po bën ‘puç’. “Para se të vendosim dua të di shkakun e vërtetë pse s’vjen. Më zuri veshi se thatë që nuk njeh legjitimitetin e Kuvendit. Ta lexojmë, nëse nuk njeh legjitimitetin e Kuvendit, ky është puç, nuk njeh më Republikën Parlamentare, kështu është? Na e lexoni edhe një herë të lutem si është”, tha Braho. Më herët, Meta i është përgjigjur Kuvendit për ngritjen e Komisionit Hetimor. Meta thotë se kjo kërkesë, në përmbajtje të saj, nuk referon asnjë dispozitë kushtetuese dhe ligjore për bazueshmërinë e saj.
“Kuvendi duhet të mbajë në konsideratë se, çdo kërkesë për informacion në kuadër të ndonjë procesi “hetimor”, është e palegjitimuar, fiktive, jashtë çdo lloj afati, dhe jo vetëm që cenon hapur të gjitha parimet kushtetuese demokratike të shtetit të së drejtës, por në mënyrën se si është iniciuar, vlerësuar, miratuar dhe po vijon të realizohet, tregon qartë se përpiqet të krijojë idenë se Kuvendi po ushtron funksionet e tij, ndërkohë që, asnjë proces i kësaj natyre (hetimor) nuk mund të ushtrohet e të zhvillohet në këtë periudhë tranzitore të përfundimit të mandatit të Kuvendit aktual, dhe fillimit të ushtrimit të detyrës së Kuvendit të ri të zgjedhur më 25 prill 2021”, shkruan ndër të tjera Meta.
