Manchester United mbanë aktualisht vendin e dytë në Premier League edhe pse me një diferencë prej 8 pikësh me kryesuesit e Manchester City. Këtë vit objektivi i skuadrës së drejtuar nga Mourinho është fitimi i kampionatit, por që duket një mision mjaft i vështirë. Sezonin që lamë pas “Djajtë e kuq”, arritën të triumfonin në Ligën e Europës , por edhe të krijonin një ekiptë fortë e pretendent për sezonin e ri që i priste.
Ky sezon ka nisur në mënyrë mjaft të mirë për United, por pësuan disa rënie për shkak të dëmtimeve që bënë të pësojnë dy disfata dhe dy barazime në 11 javë. Një ndër lojtarët më të spikatur dhe që ishte lojtari kyç në mesfushën e Mourinhos është i dëmtuar prej disa javësh dhe kjo ka krijuar një disbalancë të madhe në ekip. Është Pogba që organizonte lojën dhe ka dhënë shumë në sezonin që lamë pas, kjo ka bërë që mungesa të ndjehet shumë. Matic, Herrera dhe Mikhitarian nuk kanë arritur të gjejnë balancat e duhura në mesfushë që të bëjnë të mos ndjehet mungesa e tij.
Në repartin e mbrojtjes është një mungesë tjetër mjaft e rëndësishme ajo e argjentinasit Rojo. Ka vuajtur shumë në mbrojtje Manchesteri në këto ndeshje duke pësuar edhe disa gola foshnjarakë, që me prezencën e Rojo mund të ishin evituar falë forcës dhe klasit që ka ai në këmbët e tij.
Një mungesë tjetër mjaft e rëndësishme është në majën e sulmit, është Zlatan Ibrahimovic që përtej moshës sezonin që lamë pas ka qenë fantastik. Ai ka shënuar 28 gola në 46 ndeshje për djajtë e kuq, por ai dëmtim në ligament e ka lenë atë jashtë deri në Krishtlindje. Eksperienca, forca fizike, klasi që ka Ibra do ta kishinndihmuar Mou-n që të shënonte më shumë dhe të mos i mbyllte ndeshjet në ato rezultate të ngushta. Por nga ana tjetër është lodhja që ka pësuar i vetmi sulmues qendrorë që kanë në ekip, Lukaku. Ai nuk ka bërë asnjë pushim që nga starti i kampionatit e deri tani dhe kjo ka bërë që të mos jetë në formën që ishte në fillimin e sezonit ku gjente rrugën e rrjetës në çdo ndeshje.
Lajmet e mira kanë trokitur në derën e Manchester United, infermieria ka njoftuar që Pogba dhe Rojo do të jenë të gatshëm për Mourinhion pas pushimit që do të kenë për efekt të miqësoreve që do të zhvillojnë ekipet kombëtare. Ky është lajmi më i mirë që mund të merrte ekipi pas disfatës që pësoi me Chelsean në fundjavën që lamë pas, por sinjale të mira vijnë edhe nga bomberi suedez Ibrahimovic. Ai do të jetë i gatshëm në muajin dhjetor dhe ka paralajmëruar se do të jetë një rikthim i madh. Ai ka kërcënuar ekipet e Premier League se do të zbresë edhe njëherë në fushë për të përfunduar atë që kishte nisur, pra për të fituar kampionatin dhe pastaj do të mendojë largimin. Me rikthimin dhe ekipin e plotësuar që do të ketë tekniku portugez mbetet për tu parë fuqia e Manchesterit dhe nëse do të arrijnë të kapin Cityn e Guardiolas që duket perfekt në këto 11 javë të luajtura.
