Kuvendi ka njoftuar Komisionin Qëndror të Zgjedhjeve për vakancën e krijuar pas lënies së mandatit të deputetit nga ish-ministri i Brendshëm, Saimir Tahiri. Në këtë mënyrë hapet procedura për zëvendësimin e mandatit të Tahirit.
Ndonëse prej më shumë se 6-muajsh Saimir Tahiri ishte deputet i pavarur, mandati i tij do t’i kalojë grupit parlamentar të socialistëve .
Ish-ministri Tahiri u zgjodh deputet në garën elektorale të 25 Qershorit nga listat e Partisë Socialiste në qarkun e Tiranës, ku selia rozë mori 18 mandate deputetësh.
Mandati i Tahirit pritet t’i kalojë këshilltarit për Marrëdhëniet me Parlamentin i Kryeministrit, Spartak Braho, i cili renditej i 19 në listën e kandidatëve për deputetë të PS-së në këtë qark.
