Konfliktet për pronën vijojnë të jenë mjaft shqetësuese për vendin tonë. Një tjetër rast ka ndodhur në Bulqizë, ku pas një sherri mes kushërinjve, ka përfunduar me 3 të plagosur më thikë, njëri prej të cilëve në gjendje të rëndë.
Ngjarja tronditëse është shënuar në fshatin Ostren i Madh, rreth orës 21:40 të mbrëmjes së të enjtes. Pas një konflikti për motive pronësie, shtetasi Vullnet Muça, 38-vjeç, ka plagosur me thikë shtetasin Sh. M., 52-vjeç dhe djalin e tij 16-vjeç, A.M.
52-vjeçari ka marrë dëmtime të rënda në trup, dhe është dërguar me ambulancë në Spitalin Ushtarak Tiranë, për shërbim më të specializuar. Bluzat e bardha thonë se ai ndodhet në gjendje të rëndë shëndetësore.
Ndërsa i mituri është plagosur lehtë, dhe pas mjekimit ka dalë nga spitali.
Gjithashtu po gjatë konfliktit, shtetasi me inicialet A.M., ka plagosur lehtë shtetasin Vullnet Muça.
Policia ka bërë arrestimin e këtij të fundit, për veprën penale “Plagosje e rëndë me dashje”, “Mbajtje e armëve të ftohta”.
Ndërsa ndaj 16-vjeçarit ka filluar procedimi penal në gjendje të lirë, për veprën penale të “Plagosjes së lehtë me dashje”.
Në cilësinë e provës materiale është marrë dhe sekuestruar arma e krimit, thika me të cilën autori ka kryer plagosjen e shtetasit Sh.M.
Sa më sipër, materialet proceduriale do ti kalojnë Prokurorisë Pranë Gjykatës së shkallës së parë Dibër, për veprime të mëtejshme.
