Në Qendrën e Numërimit dhe Rezultateve do të bëhet numërimi i votave me kusht, votave me postë dhe atyre të personave me nevoja të veçanta, për komunat Prishtinë dhe Prizren.
Megjithatë, fillimisht do të bëhet rinumërimi i votave në 35 vendvotimet në Komunën e Dragashit dhe tre në atë të Rahovecit, proces ky i cili ka nisur që në orën 10:00 në QNR.
Lajmin e bën të ditur zëdhënësi i KQZ-së, Valmir Elezi i cili ka thënë se pasi të kryhet procesi i numërimit në këto dy komuna Rahovec e Dragash, do të vazhdojnë me Prishtinën dhe Prizrenin, ku pritet të numërohen votat me kusht e postë.
Me kërkesë të PZAP-së, Elezi ka thënë se rinumërimi i votave do të bëhet vetëm në Dragash e Rahovec:
“Sot në qendrën e numërimit të rezultateve është paraparë që të bëhet rinumërimi i vendvotimeve ashtu siç ka vendosur PZAP për Komunën e Dragashit dhe Rahovecit. Menjëherë të votimit të këtij rinumërimi do të fillojë numërimi i votave me kusht, votave përmes postës dhe votave të personave me nevoja të veçanta për këto dy komuna pastaj pas numërimit të këtyre dy komunave do të fillojmë me numërimin i votave me kusht në Komunën e Prishtinës dhe Prizrenit”, ka deklaruar Elezi.
Sipas këtij të fundit, procesi i numërimit mund të mbyllet brenda ditës.
