Revolucioni tek Partizani ka preku një pjesë të mirë të senatorëve që cilësoheshin si të paprekshëm. Së fundmi ndodhi edhe një përplasje mes trajnerit Starova dhe Lorenc Trashit, që prej shumë vitesh mbart fanellën e të kuqve. Drejtuesit vendosën ti ndëshkonin të dy dhe Trashi momentalisht ka kaluar në ekipin e të rinjve. Po ashtu janë larguar një pjesë e mirë e lojtarëve të sjellë nga stafi italian që drejtoi Partizanin në fillim të sezonit. Befasi ishte largimi i Krasniqit, Vilës dhe Malotës, të cilët u anë jashtë ekipit në momentin e nisjes për Turqi për fazën përgatitore.
Ndërsa dje u prezantuan qendërmbrojtësi Renato Gojkoviç, vetëm 22 vjeç, i ardhur nga kampionati kroat, mbrojtësi 19-vjeçar Senad Hysenaj, i marrë nga Vllaznia, si dhe anësori ofensiv Emran Ramadani, marrë nga Renova.
Në stërvitjen e paradites së djeshme kanë dalë edhe dy emra të rinj. I pari është mesfushori 19-vjeçar Henri Okebugu, i cili në pjesën e parë të sezonit ishte tek Egnatia dhe prova te Partizani është paralajmëruar prej javësh. Emri i dytë është një surprizë dhe sipas klubit bëhet fjalë për një futbollist me të dhëna të shkëlqyera. Bëhet fjalë për Xhin-Hjun Li, mesfushor nga Korea e Jugut, i cili është vetëm 20 vjeç.
Li është pjesë e kombëtares U21 dhe kombëtares olimpike të Koresë së Jugut, ai është në pronësi të Pohang Stilers, një ndër klubet më të rëndësishëm të vendit. Në verë Pohangu e huazoi tek Austria e Vjenës në Austri dhe aty Li ka luajtur 16 ndeshje mes kampionatit, kupës e Ligës së Europës, duke shënuar edhe një gol në gusht në kampionat.
Titullar tek Austria e Vjenës, në huazim për një vit dhe me të drejtë blerjeje për kontratë 3-vjeçare, titullar i Koresë së Jugut U-23: A është e mundur të vijë një lojtar i tillë në Shqipëri? Dhe më qesharakja: a mund të vijë një lojtar i tillë në provë? E pamundur, përtej këmbënguljes së klubit se është ai lojtar.
PARTIZANIN E KANË GËNJYER? – Në të vërtetë, futbollisti që është paraqitur te Partizani për provë nuk ka lidhje me atë të Austrisë së Vjenës. Përtej faktit që Li i Austrisë është lojtar tepër cilësor për një kampionat si ky i yni, zbulohet që koreano-jugori është në grumbullim në Qipro, me Austrinë e Vjenës. Jo vetëm kaq, por ai luajti titullar të hënën pasdite, në miqësoren kundër Dinamos së Bukureshtit. Duke krahasuar edhe fotot e siguruara nga stërvitja e Partizanit, kuptohet që nuk bëhet fjalë për atë lojtar.
