NATO është një nga aleancat që goditet më shumë nga sulmet kibernetike. Me sa duket sulmet janë të përqendruara dhe ka grupe të caktuara që kërkojnë të kenë akses në të dhënat e aleancës. “Çdo muaj NATO po goditet nga rreth 500 sulme kibernetike” kjo është deklarata e Drejtorit të Përgjithshëm për Komunikim dhe Informacion në NATO, Kevin Scheid.
Në Konferencën Vjetore të Agjencisë Evropiane të Mbrojtjes (EDA) në Bruksel, Scheid njoftoi për aktivitetet e kësaj aleance në fushën e mbrojtjes kibernetike.
Ai theksoi rolin kyç të ndarjes së informacioneve për zhvillimin e aftësive të shteteve në fushën e mbrojtjes kibernetike. Scheid tha se i kushtojnë rëndësi bashkëpunimit të NATO-s me Bashkimin Evropian (BE) në këtë fushë.
Duke i krahasuar sulmet kibernetike me cunamin, Scheid tha se për këtë arsye sistemet e paralajmërimeve të hershme kanë rëndësi jetike.
“Rrjetet kibernetike të NATO-s sulmohen rreth 500 herë çdo muaj”, thotë Scheid, duke mos dhënë informacione për burimin e sulmeve.
NATO, përveç ajrit, tokës dhe detit edhe fushën kibernetike e vlerëson si një fushë ushtarake.
Në takimin e Ministrave të Mbrojtjes të NATO-s të organizuar në fillim të këtij muaji, u mor vendimi për themelimin e një Qendre të operacioneve kibernetike, për rritjen e luftës ndaj sulmeve kibernetike.
