Basha u shpreh sot në një prononcim për mediat se kriminelët i kanë dhënë Edi Ramës 10-15 mandate. Ai ka parashtruar një sërë pyetjesh sa i takon Vangjush Dakos. Enigma e radhës ka të bëjë me faktin se përse nuk po arrestohet kreu i bashkisë së Durrësit, Vangjush Dako.
Goditja e grupit të Avdylajve, të arrestuar si trafikantë droge, po serviret nga opozita si një lëvizje e parakohshme për të shpëtuar “peshqit e mëdhenj”. Njëri prej tyre është kreu i bashkisë së Durrësit, Vangjush Dako. PD ka akuzuar se dosja e tij është ndarë me një manovër politike nga ajo e 44 të arrestuarve të tjerë, për të mos i dhënë kosto shtesë mazhorancës.
“Pyetja sot është përse nuk arrestohet Vangjush Dako? Kush ka ndërhyrë? Kush ka bërë përpjekje prokurorëve për të mos e arrestuar Vangjush Dakon? A po hidhen miliona për të mos e arrestuar Vangjush Dakon?”. Këto ishin pyetjet që ngriti kryetari i opozitës, Lulzim Basha.
“Vangjush Dako figuron si person kyç i bashkëpunimit me bandën e Avdylajve, dhe banda të tjera në Durrës. Ku me para me shantazhe me deklarimin e zonave të tëra në Shijak, ku nuk mund të hyjë opozita, të japë favore. Dhe madje të lirojë nga burgu. Ju kujtohet Lul Berisha, apo jo?
Diferenca apo e reja në këtë dalje timen sot është se këto figurojnë si prova zyrtare në dosjen hetimore 339. Ka hetime në të gjithë Shqipërinë ku zyrtarët e Edi Ramës, kryebashkiakët janë kapur në pazare për blerjen e votave. Veçanërisht për zgjedhjet e vitit 2017.
Qëndrimi i opozitës është i qartë dhe unik. Nuk mund të pranojmë ne që partnerëve kriminela të nxirren nga thesi një a dy persona si koka turku. Pasi kjo është një aferë ku janë përfshirë të gjitha kokat e Rilindjes”.
