Aleksander Rankoviç, ka qenë krahu i djathtë i Titos për shumë vite. Ai themeloi shërbimin sekret jugosllav UDB, dhe drejtoi për 20 vite rresht Ministrinë e Brendshme. Rankoviç, ishte arkitekti i shfarosjes, dhe i dëbimit të qindra mijëra shqiptarëve të Kosovës nga trojet e tyre, gjatë dhe pas Luftës së Dytë Botërore.
Vlerësohet se gjatë viteve 1946-1966, në Kosovë dhe në viset e tjera shqiptare në Jugosllavi, u vranë pa gjyq mbi 70 mijë shqiptarë. Ndërkohë 250 mijë të tjerë u detyruan të emigrojnë kryesisht në Turqi, për t’ua lënë tokat dhe shtëpitë kolonëve serbë.
Masakra më e përgjakshme ndodhi në Tivar, ku dyshohet se janë vrarë mbi 8 mijë shqiptarë të Kosovës. Në atë masakër, ka dyshime për një bashkëpërgjegjësi të drejtuesve komunistë shqiptarë. Rankoviç u shkarkua më 1966 nga Tito, pasi ky i fundit zbuloi se ishte vënë në përgjim nga UDB-ja.
Pavarësisht masakrimit të mijëra shqiptarëve, Rankoviç dekorohet më 5 shtator 1945 me “Yllin Partizan të Klasit të Parë” nga qeveria komuniste e Enver Hoxhës. Dekorimi ndaj këtij antishqiptari të tërbuar, qëndron ende sot në fuqi.
