Mediat serbe i kanë dhënë jehonë arrestimit të Marko Gjuriçit në Kosovë, rast të cilin ato po vazhdojnë ta quajnë si “sjellje e dhunshme e Policisë së Kosovës”.
Telegrafi serb shkruan sot se personi që ishte në krye të operacionit për arrestimin ishte Mentor Shabani, i cili nga mediat serbe citohet se më 2014 kreu trajnimet në bazën “Adem Jashari”
Ish-shefi i qendrës së koordinimit për Kosovën në Serbi, Nebojsa Çoviç, thotë se duhet pasur kujdes të shtuar tani e tutje që ky person nëse tenton të hyj në Serbi, të arrestohet.
“Është një person emri i të cilit duhet të ruhet në arkivat tona, nëse ai tenton të hy në Serbi”, thotë Çoviç.
Madje, mediat serbe e cilësojnë Shabanin si një njeri që udhëhoqi operacionin brutal që hodhi”turp mbi shtetin e Serbisë.”
Ndërsa, Gjuriç u arrestua dje në Mitrovicë pasi kishte refuzuar të kërkonte leje nga autoritetet e Kosovës për hyrje në territorin e shtetit.
