Nga: Marsela Sinani/Teksa ditët po na afrojnë për startimin e vitit të ri shkollor, misioni i deputetëve socialistë është që të bëjnë një fushatë sa i takon librave falas. Këto ditë kanë qenë mjaft produktive, e ndërsa ministrja, kryeministri dhe jo vetëm, shkojnë derë më derë, për të treguar me krenari se sa me sukses po shkon kjo nismë. Por për fat të keq, kjo nuk është gjë tjetër veçse një gënjeshtër e pastër, për sa kohë ato libra duhet të rikthehen me përfundimin e vitit shkollor, dhe këtu s’ka nevojë për komente!
Fëmijë të lumtur që marrin pakot e stolisura bukur, janë një anë e medaljes se çfarë të ofrohet nga video-t që poston kryeministri Rama në Facebook. Por kjo tablo bëhet edhe më e plotë kur deputetët socialistë “aktrojnë” aq bukur, duke u thënë fëmijëve që u kanë mbirë në derë, se tashmë ata janë me fat, pasi nga sot e tutje nuk do të rëndohen më xhepat e prindërve të tyre.
Fushata e cila ka ditë që ka nisur, e që synon të promovojë vendimin e qeverisë për shpërndarjen e librave “falas”, për fat të keq ka përdorur fëmijët në mënyrën më të shëmtuar. Fëmijë të ciilët për shkak të moshës dhe sinqeritetit të verbër, të drejtuar edhe nga prindërit, u duhet që të bëhen pjesë e kësaj shfaqje, duke u thënë 1-mijë herë faleminderit që po marrin librat falas, e ato duhet ti ruajnë si “sytë e ballit”, se më pas do i përdorin brezat pasardhës.
Për të sqaruar të gjithë këtë amulli, vlen të theksohet se vendimi i qeverisë parashikon që librat të rikthehen në fund të vitit shkollor, dhe vetëm nëse do të jenë mirëmbajtur në mënyrë perfekte nga të miturit, atëherë prindërit nuk do t’i paguajnë. Në të kundërt, prindërit do t’i paguajnë paratë e librave të dëmtuar, madje me çmime më të kripura se një vit më parë.
Në një ndër videot virale, kryeministri Rama, mjaft sportiv dhe me një të qeshur të stampuar në fytyrë, u kujtoi fëmijëve se librat janë të “shenjtë”, dhe se për asnjë arsye nuk duhet të lënë shënime. Të vegjlit duhet të mësohen se librat duhen marë të paketuar dhe ashtu duhet të dorëzohen.
Në të kundërt, prindërit do të jenë ata që duhet të përballojnë koston e një zhkaravine! Kjo skemë e trumbetuar me aq finesë nga PS, tregon se si shqiptarët e hanë “sapunin për djathë”, pasi prodhimi i librave është paguar nga buxheti i shtetit, nga taksat e qytetarëve, dhe jo me paratë e kësaj force politike.
Përpos shfaqjeve të realizuara me mjaft mjeshtëri, ku jo vetëm fëmijët, por edhe prindërit shfaqin një interes të shtuar para kryeministrit, pjesa tjetër e cila nuk merr pjesë në këtë teatër kanë shprehur haptazi ankesat. Ata nuk kanë kursyer ironinë, por Rama është munduar të sqarojë pjesën më të madhe, se kjo nuk është një risi, por e adaptuar nga vende të tjera.
190 mijë fëmijë do të marrin librat “falas” këtë vit, nga klasa e parë deri tek e katërta. Premtimi i Ramës është që vitin tjetër, edhe fëmijët e klasave të pesta të kenë të njëjtin fat. “Vitin tjetër librat do të jenë falas edhe për klasën e pestë, dhe në fund të mandatit synojmë mundësinë që për të gjithë nxënësit me arsimin e detyruar, librat shkollorë të jenë falas”, ka thënë më herët Rama. Deri të hënën e 17 shtatorit do kemi të njëjtin avaz, deputetë që luajnë rolin e mësuesit, prindit, edukatorit…
