Nga Mentor Kikia
Kodi Penal i RSH do të ndryshojë sërish. Do të pasurohet! Do të përfshihet burg për ata që dalin nga shtëpia tani në kohën e coronës. Burg, edhe më shumë për ata që vijnë nga jashtë e nuk qëndrojnë në shtëpi. Ishte pasuruar me parë me gjoba e burg për ata që vjedhin energjinë elektrike. Për ata që hedhin mbeturinat në rrugë, për ata që ndotin lumin dhe detin…
Kolegu Gert Shella shkruajti: “Ky është landfilli më i madh legjislativ në RSH. Çdo mbetje që lë pas politika e ditës grumbullohet aty. Çdo produkt një-përdorimsh, bashkë me ambalazhin po aty..”.
E referova Gertin, pasi jo vetëm që ndaj të njëjtin mendim, por mendoj që ka edhe më shumë.
Kodi Penal apo procedurat tona ligjore në tërësi, më shumë janë dëshmi e paaftësisë së shtetit për të funksionuar.
Ligji parashikon që kush pret pemën dënohet me gjobë. Por shteti është i paftë apo i korruptuar, ta kapë dhe gjobisë atë që pret pemët. Atëherë qeveria forcon ligjin, e dënon me burg. Por sërish askush nuk e kap atë që pret pemët. Qeveria e rrit sërish masën e dënimit, por pylli pritet sërish, sepse ai që pret pemët është i afërmi i deputetit të zonës.
Nëse qeveria nuk ka mundësi ti mbledhë mbeturinat nëpër fshatra e zona të tjera, nxjerr një ligj për të dënuar me gjobë ata që i hedhin mbeturinat në lumë apo përrua. Por sërish asgjë nuk ndryshon, sepse në fshat nuk ka kazanë. Atëherë qeveria e forcon sërish ligjin, e dënon me burg atë që hedh mbeturinat. Por sërish nuk ka kazan dhe serish asgjë nuk ndryshon. Atëherë qeveria e ndryshon sërish Kodin Penal, e rrit dënimin, nga 1 në 3 vjet burg. Por sërish asgjë nuk ndryshon. Sepse në fshat sërish nuk ka kazan.
Çdo vit ka nisma për të forcuar ligjet kundër krimit në familje, e çdo vit rritet numri i grave të vrara. Pa të rrahurat nuk i numëron kush…
Me pak fjalë, Kodi Penal dhe i Procedurës Penale, magazinojnë paaftësinë e shtetit për të vepruar, i cili në pamundësi për të zbatuar ligjet, e gjen zgjidhjen tek forcimi i ligjit, me shpresën se keqbërësit do të tremben.
