Kryetari i Shoqatës së Transportit qytetas, Rexhin Qoshja, ka shuar shpresat se së shpejti qytetarët do të kenë mundësi të lëvizin me autobus, dhe se ende nuk kanë një urdhër nga qeveria. Ai deklaroi se transporti publik nuk është një domosdoshmëri si në vendet e tjera, dhe se futet te qarkullimet e luksit. Por në të njëjtën kohë tha prerazi se pa u plotësuar pikat e parashtruara më herët, është e pamundur që të nisë transporti.
“Ne jemi ende në pamundësi për të nisur. Ende nuk kemi një urdhër tjetër për të rifilluar. Transporti publik nuk është një domosdoshmëri si në vendet e tjera, por futet te qarkullimet e luksit. Jemi para faktit që transporti publik duhet të lëvizë më pak. Ne kemi kërkuar heqjen e akcizës.
Jemi të paaftë për të dhënë një përgjigje korrekte se kur mund të fillojmë. Pa u plotësuar pikat tona, është e pamundur të rifillojmë.
Ne mezi presim të rifillojmë. Përveç punonjësve që janë pa punë, ne do të përballemi edhe me problematika teknike, por janë operatorët që kanë detyrime në taksa, karshi bankave. Ne nuk jemi shumë komodë të bëjmë protesta, duam të fillojmë punën. Vendimarrësit të lëvizin më shpejtë”, u shpreh ai.
