Ish-kryetari i Komisionit Qendror të Zgjedhjeve(KQZ), Kristaq Kume deklaroi sot gjatë një komunikimi në media, se shtyrja me një javë e datës së zgjedhjeve, mund të rregullohet me një dispozitë kalimtare në Kodin Zgjedhor dhe se kjo nuk përbën shkelje të Kushtetutës, për aq kohë sa ka konsensus mes palëve.
Eksperti për çështjet zgjedhore, Kume e cilësoi situatën të ngjashme me atë të zgjedhjeve vendore të 2007, ku edhe pse data e zgjedhjeve ishte dekretuar më 20 janar, përmes hartimit të një dispozite rregulluese kalimtare, u ricaktua një datë tjetër, 18 shkurti i po atij viti.
Ai siguron se Kodi nuk del mbi Kushtetutën, pasi sipas tij jemi në kushtet kur dakortësia politike është e tillë që nuk do të zhvillohen zgjedhje më 18, por më 25 qershor.
“Nevojitet dispozitë kalimtare në Kodin Zgjedhor për të nxjerrë jashtë loje 18 qershorin, për të ricaktuar datën e zgjedhjeve në 25 qershor. Kushtetuta ia ka deleguar për të përcaktuar datën, Presidentit, 9 muaj përpara përfundimit të mandatit dhe Presidenti e ka bërë në dhjetor të 2016. Në këtë dispozitë rregulluese i kërkohet Presidentit të ricaktojë 25 qershorin si datë për zgjedhjet. Jemi në kushtet kur dakordësia politike është e tillë që nuk do zhvillohen zgjedhje në 18, por Presidenti duhet të angazhohet dhe të ndryshojë nenin e mëparshëm për të dekretuar një datë të tillë, që nuk bie ndesh me Kushtetutën sa i takon kohës që duhet të zhvillohen zgjedhjet”, tha Kume.
