Në Nyon të Zvicrës u hodh ditën e sotme shorti për turin kualifikues në Champions League ku marrin pjesë edhe dy skuadra shqiptare, Kukësi dhe Shkëndija e Tetovës. Nënkampionët e Shqipërisë ndodhen në këtë kompeticion pasi Gjykata e Arbitrazhit CAS la në fuqi dënimin mbi Skënderbeun me 10 vite pezullim nga Kupat e Europës, ndërsa Shkëndija vjen si kampione e Maqedonisë.
Kujtojmë se ndeshjet e këtij raundi do të luhen më 10/11 korrik dhe 17/18 korrik. Goglat e kanë vënë Kukësin përballë kampionëve të Maltës, Valleta. Ndeshjen e parë verilindorët do ta zhvillojnë në Shqipëri, në datën 11 ose 12 korrik, ndërsa atë të kthimit 1 javë më pas në kryeqytetin e Maltës, Valleta.
Tetovarët e Shkëndijës, nga ana e tyre, do ta nisin përfaqësimin në këtë tur të Champions-it duke luajtur kundër skuadrës së Uellsit, The New Saints. Ndeshjen e parë Shkëndija do ta luajë në Maqedoni, ndërsa atë të kthimit në Uells.
