Më 24 shtator në Gjermani do të mbahen zgjedhje të përgjithshme, por politikanët ndjehen të frikësuar. Frika e tyre nuk është e pa bazë sepse konfirmohet dhe nga Agjencia gjermane e Inteligjencës.
“Ne presim sulme të reja dhe po vëzhgojmë me kujdes kërcënimet”, ka thënë shefi i agjencisë së inteligjencës, BfV Hans-Georg Maassen, gjatë një konference në Postdam.
Maassen ka thënë se agjencia ka hasur në sulme që kanë pasur për qëllim vjedhjen e të dhënave nga e-mailet e partisë Kristian-Demokrate të kancelares Angela Merkel.
Ai ka thënë se zyrtarët gjermanë janë në vigjilencë të lartë pas raportimeve të zyrtarëve të inteligjencës amerikane se materiale të ndjeshme janë marrë nga Komiteti Kombëtar i Partisë Demokrate në SHBA, për të ndikuar në zgjedhjet presidenciale të vitit 2016.
Maassen shtoi se “një numër i madh i të dhënave” janë marrë gjatë sulmeve kibernetike të majit të vitit 2015, në dhomën e ulët të parlamentit gjerman. Gjermania për këto sulme ka fajësuar një grup të hakerëve rus, të njohur si APT28, dhe një grup tjetër të quajtur Fancy Bear.
