Për Laura Denmar dhe të dashurin e saj, kjo nuk ka qenë aspak një verë e këndshme. Studentja britanike u qëllua barbarisht me një shufër metalike nga pastruesja e hostelit në Kroaci.
Ajo dhe i dashuri i saj, Jeremy prenotuan online një hostel, ku paguanin 60£ nata. Kjo pasi çmimet e hoteleve janë shumë të larta, gjatë sezonit. Por, kur ata arritën në qytetin piktoresk Dubrovnik, menjëherë u dërguan në një periferi të zymtë.
“Na thanë që duhej të merrnim çelësat në një tjetër hostel dhe të shkonim tek apartamenti ynë. Kur ne arritëm e kuptuam që asgjë nuk ishte e ligjshme, ishin 30 krevate, vetëm një banjo dhe askush që të na përgjigjej.
Nuk kishim ku të shkonim dhe kishim paguar, ndaj vendosëm të qëndronim. Në ditën e fundit, një pastruese erdhi shumë herët dhe na tha se duhej ta largoheshim menjëherë ose do të paguanim më shumë. Unë i thashë se ishte e paarsyeshme dhe refuzuam t’i paguanim më shumë. Ajo na kthen se do të merrte policinë nëse nuk iknim. E dija që ajo çka po bënte ishte ilegale, ndaj i thashë t’i merrte autoritetet. Por, ajo mori një burrë, i cili mendoj se ishte pronari. Ne vendosëm të iknim sa më shpejt të ishte e mundur, por ajo mbylli dyert dhe nuk mund të dilnim deri sa të vinte burri me të cilin foli në telefon.
Kur ai erdhi, përplasi të dashurin tim në mur dhe gruaja filloi të më godasë mua me shufër metalike. Ishte e tmerrshme. Si pasojë e goditjeve unë u dërgova në spital, pasi kisha një dorë të thyer, të nxira në krahë e trup. Si edhe kisha një plagë në kokë, e cila kishte nevojë për qepje.”
26-vjeçarja bëri denoncim pranë policisë kroate dhe ka qenë në kontakt të vazhdueshëm me Ambasadën Britanike. Por, ajo frikësohet se të tjerë mund të bien pre dhe se bizneset e dyshimta mund të përfitojnë si pasojë e turistëve të shumtë që ndodhen në qytet.
“Prej fillimit ishte e dukshme që e gjitha ishte diçka kundër ligjit dhe se sulmi ishte i paramenduar. Çfarë ne përjetuam ishte e papërshkrueshme dhe do të ishte e tmerrshme nëse do t’i ndodhte edhe dikujt tjetër. Dua thjesht që njerëzit ta dinë çfarë më ndodhi mua, në mënyrë që të bëjnë më shumë kujdes kur prenotojnë online.”
Përshtati: TIRANA TODAY
