Kryetari i Kuvendit të Republikës së Kosovës, Kadri Veseli, deklaroi sot se shteti i Kosovës nuk cenon askënd, pasi sipas tij, integriteti territorial dhe kufijtë e shtetit janë të shenjtë, të paprekshëm, por sqaron se nuk do të lejojë që askush të sillet ndryshe me të.
I pranishëm në ceremoninë e certifikimit të rekrutëve të rinj të Ushtrisë së Kosovës, Veseli, e konsideroi ditën e sotme ditë krenarie për të gjithë, ndërsa të qenit pjesëtarë të ushtrisë më të re në botë, ai e cilësoi privilegj për të cilin do të kenë lakmi gjeneratat që do të vijnë pas.
“Ju jeni pjesë e një force mbrojtëse, të lindur e zhvilluar në partneritet me NATO-n, Aleancën më të fuqishme në botë, garantuese e vlerave të lirisë dhe demokracisë. Ne sot ndihemi krenarë me ju. Ne besojmë në përkushtimin atdhetar dhe profesionalizmin tuaj. Ju e keni nderuar atdheun kudo që keni marrë pjesë në garat ndërkombëtare, njësoj si sportistët tanë. Ju u keni dëshmuar aleatëve tanë seriozitetin dhe gatishmërinë tonë për të qenë pjesë e misioneve të përbashkëta në të mirë të paqes e njerëzimit. Me ju Kosova ndihet më e sigurt në të tashmen dhe të ardhmen e saj”, tha Veseli.
Kryeparlamentari u shpreh më tej, se Kosova po ndërton një ushtri e cila pasqyron shpirtin liridashës të popullit dhe vlerat mbi të cilat qëndron ky shtet.
“Ushtria e Kosovës është sot element i domosdoshëm i stabilitetit dhe paqes në rajon. Ushtria e Kosovës do të vazhdojë procesin e fuqizimit e profesionalizimit të saj, për tu bërë gati për fazën e anëtarësimit në NATO. Ne do t’ia dalim, siç ia kemi dalë gjithmonë. Kosova ka veç një rrugë: rrugën përpara, zhvillim ekonomik, fuqizim të shtetit, integrim në NATO dhe BE. S’ka rrugë tjetër dhe s’do ta lejojmë askënd të na orientojë tjetërkah”, shtoi Veseli.
