Nga: Marsela Sinani/Procesi i dixhitalizimit ka sjellë një revoltë të hapur jo vetëm nga ana e qytetarëve, por edhe nga klasa politike, të cilët kanë nxjerrë tymin e radhës. PD e LSI janë rreshtuar krah qytetarëve, të cilët e cilësojnë vendimin e “sheqerosur” të AMA-s, si një masë ndëshkuese, e për rrjedhojë duke falimentuar TV lokale.
https://tiranatoday.com/dixhitalizimi-i-mediavepanariti-kanocja-e-biznesit-tim-kanocja-e-biznesit-tend/
Qytetarët u turrën në dyqanet e dekoderave, duke lënë aty dhe ato pak lekë që kishin lënë mënjanë për raste të vështira. Shqiptarët iu rikthyen radhëve, si një herë e një kohë, për të blerë aparate të reja, e për të parë kanalet televizive në Tiranë dhe Durrës, pasi Autoriteti i Mediave Audiovizuale ndërpreu transmetimet analoge.
Për familjet në nevojë janë shpërndarë 88 mijë aparate, por shumë të tjerë ankohen se përse duhet të paguajnë sërish për të parë transmetimet televizive, për të cilat tashmë paguajnë taksën e Televizionit Publik Shtetëror.
Pakënaqësitë u ‘përkthyen’ edhe me ndonjë të sharë nëpër dhëmbë, ndonjë status në rrjetet sociale, por në fund, të gjithë u rreshtuan në radhë për të paguar paratë.
Një ndër faqet ku njerëzit gjetën terren për t’ia nxirë jetën ishte ai i Ramës. Aty ata shpërthyen në të shara, madje edhe me epitete, për të cilat Rama nuk e ka vënë ‘ujin në zjarr’.
https://tiranatoday.com/ne-radhe-per-te-blere-dekodera-pas-erresires-ne-tv-qytetaret-rames-cfare-filmi-do-shohim-sot/
Referuar kësaj situate mjaft të ndjeshme për popullin shqiptar, një reagim është përcjellë nga kreu i Autoritetit të Mediave Audiovizive, Gentian Sala, i cili dha disa shpjegime në lidhje me mbylljen e transmetimeve analoge në Tiranë e Durrës. “Shqiptarët, tha ai, nga sot do të kenë mundësi të shikojnë 34 kanale falas dhe me një cilësi të lartë transmetimi.
“Në këtë mënyrë, nga dita e sotme dhe në vijim, në këto dy qarqe, ku banojnë rreth 1/3 e popullatës së Shqipërisë, ndjekësit e programeve televizive do t’i arrijnë ato vetëm në mënyrë dixhitale. Fikja e transmetimeve analoge nga televizionet kombëtare apo ato lokale e rajonale është shoqëruar dhe me mbylljen e transmetimeve dixhitale të palicencuara, si dhe është zgjidhur çështja e renditjes së kanaleve, sipas përcaktimeve ligjore që ka bërë AMA. Prej përfundimit të këtij procesi, qytetarët do të ndjekin 34 kanale pa pagesë nga paketat programore publike dhe private që janë në transmetim”, theksoi Sala.
Gjatë fjalës së tij, Sala u shpreh se për shitjen e dekoderave janë 5 subjekte të autorizuara, duke theksuar se nuk ka asnjë situatë monopol. “Ka mbi 5 subjekte që shesin dekoderat, të cilët kanë pika të shumta. Pra nuk ka situatë monopol. Për t’u pajisur me dekoderët e rinj është dhënë ndihmë ekonomike për të paktën 88 mijë qytetarë, që janë në nevojë, ose janë të pajisur me kartën e nevojës ekonomike. Procesi i dixhitalizimit në Shqipëri ka kaluar mbi 20 vjet si asnjë vend tjetër europian. Tirana dhe Durrësi janë një zonë e rëndësishme ekonomike. Është zona kyç për zgjidhjen e dixhitalizimit. Qytetarët kanë mbi 10 vite që janë njohur që kjo procedurë do të ndodhë”, u shpreh Sala, duke shtuar se Shqipëria ka numrin më të madh të kanaleve pa pagesë.
Por çfarë pritet të ndryshojë?
I gjithë procesi do të sjellë përfitime të drejtpërdrejta që do të jenë të prekshme nga ana e publikut, ku ndër më kryesoret është rritja e cilësisë së shërbimit televiziv. Të gjitha programet që transmetoheshin në rrugë analoge, do të kalojnë në transmetime dixhitale. Do të ketë më shumë kanale televizive në dispozicion të publikut. Në këtë mënyrë do të rritet gama e programacionit, i cili përveçse gjeneralist, do të jetë edhe tematik.
Çfarë të presim nga epoka e re e televizioneve? Koha për protesta?
Mjaft të indinjuar, qytetarët janë të mendimit se protesta është rruga e vetme që zëri i tyre të dëgjohet. Këtë do ta tregojë koha…
TIRANA TODAY
