Kryetari i FRESSH-it në Ersekë, Pandi Cunge, 23-vjeç, mësohet se është arrestuar nga policia rrugore e Tiranës, pasi gjatë pasdites, në “Rrugën e Dibrës”, ai ka tentuar që të korruptonte uniformat blu.
Policia, përmes pamjeve tregon qartë se si i riu i fut mes dokumentave dhe dy kartëmonedha me prerje 1000 lekë të reja, për të shpëtuar. Një nga të rinjtë është kryetar i FRESSH-it në Ersekë dhe drejtor i Institutit të Shëndetit Publik, Pandi Cunge. 23-vjeçari ishte nën shoqërinë e drejtorit të Ujësjellësit të qytetit, Igli Radomit, shkruan “Lapsi”. Të dy drejtuesit e përfshirë në këtë akt korrupsioni, janë emëruar dhe janë zgjedhje e deputetes Elisa Spiropali, e cila mban edhe detyrën e Koordinatores së bashkëqeverisjes me qytetarët.
Deklarata e policisë
Policia Rrugore e Tiranës ka bërë të ditur se ka goditur një tjetër rast të “mitëdhënies”. Sipas kësaj policie, mësohet se nga shërbimet e Policisë Rrugore të Tiranës u arrestua në kushtet e flagrancës P. Ç., 23-vjeç, banues në Ersekë, pasi rreth orës 18:40, në “Rrugën e Dibrës”, në afërsi të kryqëzimit të “Farmacisë Nr. 10”, u konstatua duke vazhduar lëvizjen ndonëse sinjalizimi i semaforit e ndalonte atë dhe për të shmangur masën administrative për kundërvajtjen e kryer, drejtuesi i mjetit tip “BMV”me targë AA 487 CJ, i ka dhënë punonjësve të policisë dy kartëmonedha me prerje 1000 lekë të reja, të cilat u sekuestruan në cilësinë e provës materiale.
Materialet iu referuan Prokurorisë së Rrethit Gjyqësor Tiranë, për veprën penale “Korrupsion aktiv ndaj personave që ushtrojnë funksione publike”, parashikuar nga Neni 244 i Kodit Penal.
