Derbi i kryeqytetit në Itali është fituar nga Roma me rezultatin e thellë 3-1. Romanët e Di Francescos ka lënë pas krizën që kishte rënë skuadra në këto ndeshje të para, pas dy barazimeve dhe dy humbjeve. Ndeshja ka nisur në ritme të larta që në minutat e parë, me të dyja skuadrat që ishin të vendosur për të fituar.
Ndeshja është zhbllokuar në fundin e pjesës së parë nga Pellegrini, i cili ka dërguat topin në portën e boshatisur me një goditje me thembër pas një gabimi të bërë nga mbrojtja laciale, që ka nxjerrë jashtë loje ndërhyrjen e Strakoshës.
Lazio ka arritur të kthejë barazinë në minutën e 67-të me Ciro Immobile, por katër minuta më vonë ka ardhur goli i ish-lacialit Kolarov, i cili ka befasuar Strakoshën me një goditje të zgjuar dënimi.
Sfida është mbyllur përfundimisht në minutën e 86-të, kur Fazio ka realizuar golin e tretë për vendasit dhe i ka siguruar atyre tri pikët.
