Irani ka sulmuar gjatë natës me 35 raketa balistike bazat ajrore amerikane në Irak, në shenjë hakmarrje për vrasjen e gjeneralit iranian Qasem Soleimani. Raketat balistike goditën bazat e SHBA në Irbil dhe Al Asad në perëndim të Bagdadit.
Presidenti iranian Hassan Rouhani paralajmëroi SHBA, se forcat e saj do të hiqen nga Lindja e Mesme pas vrasjes së gjeneralit iranian Qasem Soleimani. Pas sulmit me raketa, paralajmërimi i radhës ka ardhur nga kryeministri izraelit, Benjamin Netanyahu.
Ai ka paralajmëruar për një hakmarrje “të fortë” kundër çdo vendi që sulmon Izraelin. Po kështu ai riafirmon mbështetjen ndaj SHBA për vrasjen e komandantit ushtarak iranian, Qasem Soleimani, në sulmin e urdhëruar nga presidenti amerikan Donald Trump.
“Kushdo që përpiqet të na sulmojë, do të marrë goditjen më të fortë”, ka thënë Netanyahu.
“Goditja më e fortë” do të jetë për ata që sulmojnë Izraelin, tha ai, në një kohë që Teherani ka nisur sulmet në bazat irakiane që strehojnë ushtarë amerikanë.
