Për shkak të kontaktit me një person të infektuar, kryeministri i Polonisë, Mateusz Morawiecki mësohet se është karantinuar. Në një video-mesazh të postuar në mediat sociale të martën, Morawiecki tha se ka pasur kontakt me personin e infektuar të premten.
Zëdhënësi i Qeverisë polake, Piotr Mueller, tha përmes një deklarate se kryeministri Morawiecki nuk është diagnostikuar me sëmundjen që e shkakton koronavirusin, COVID-19, dhe se nuk ka simptoma të saj.
Mateusz Morawiecki lajmëroi ndër të tjera se nuk do ti lëjë punët pas, ndonëse ndodhet në izolim.
“Qeveria vazhdon të funksionojë normalisht dhe mbledhja e ardhshme e saj do të mbahet përmes video-konferencës, një praktikë kjo e zakonshme në muajt e fundit”, tha Morawiecki.
Ai po ashtu u bëri thirrje qytetarëve polakë që t’i respektojnë masat për luftimin e koronavirusit, duke i dezinfektuar duart, duke mbajtur distancën sociale dhe duke mbajtur maska. Karantina e detyrueshme në Poloni zgjat 10 ditë për ata që nuk shfaqin simptoma të sëmundjes COVID-19.
