Së fundmi ka ardhur një reagim nga kryetarja e LSI-së Monika Kryemadhi lidhur me shtyrjen e negociatave.
Përmes një statusi në rrjetin social Facebook, Kryemadhi ka trumbetuar edhe njëherë kundër Ramës duke deklaruar se largimi i tij është e vetmja rrugë për Shqipërinë dhe shqiptarët.
“Shpresat për çeljen e negociatave me Shqipërinë u shuan edhe këtë qershor. Bashkimi Evropian dha sinjalin më të fortë se perspektiva evropiane me Edi Ramën dhe qeverinë e tij është e pamundur. Largimi i Ramës dhe çlirimi i sistemit nga diktatura e krimit, është e vetmja rrugë për Shqipërinë dhe shqiptarët. Ne jemi të vendosur në kauzën tonë, për themelin e demokracisë, për zgjedhje të lira dhe të ndershme”, shkruan ndër të tjera Kryemadhi.
Kjo e fundit po ashtu ka pohuar se aktualisht është koha për një bashkim kombëtar dhe se nuk duhet bërë asnjë hap pas: “Jemi të vendosur në anën e drejtë të historisë në luftën pa kompromis me krimin e organizuar dhe krijimin e një Shqipërie me mundësi të barabarta dhe liri ekonomike, që shqiptarët ta ndërtojnë jetën këtu, në shtëpinë e tyre. Sot është koha për një bashkim kombëtar! Të gjithë bashkë në 21 Qershor për Shqipërinë si gjithë Evropa. Asnjë hap pas!”
