Kryetarja e LSI-së, Monika Kryemadhi ka zhvilluar një takim me strukturat drejtuese të LSI në Durrës. Ajo ka sulmuar kryeministrin Ramën, për të cilin tha se negociatat me të nuk kanë të ardhme, por është shitje e kauzës.
Kërkesat e studentëve, Kryemadhi i cilësoi si minimale dhe detyrë të qeverisë për t’i plotësuar, ndërsa akuzoi Ramën se ka krijuar një mutacion të ekonomisë shqiptare.
Kryetarja e LSI-së u bëri thirrje drejtuesve të strukturave të lënë kartën e anëtarësisë në parti dhe t’i bashkohen të hënën protestës masive të studentëve.
Fjala e Kryemadhit:
Protestë frymëzuese e studentëve për këdo që ndihet i grabitur dhe i shfrytëzuar. Sot ata vazhdojnë qëndrestarë në kërkesat e tyre, që janë minimale dhe është detyrim i qeverisë ndaj tyre, jo i dekanëve apo rektorëve. Anëtarët e LSI-së duhet të harrojnë që janë anëtar LSI dhe të bëhen prindër. Nuk ka ndonjë prind që për hir të stabilitetit do shesë të ardhmen e fëmijëve të tij.
Normal që s’ka negociata dhe s’ka dialog. Kjo është e drejta e tyre minimale. Si erdhi kjo lëvizje?
Si rezultat i mbylljes së vendeve të punës, të rrënimit ekonomik. Sot ne nuk kemi ekonomi shqiptare, por kemi mutacion të ekonomisë. Jam e sigurt që Rama s’e kupton këtë.
Të hënën bashkojuni të gjithë studentëve në Tiranë. Nëse të hënën nuk iu bashkohemi pa karta anëtarësie, do jetë shumë vonë për ata, për ne, për Shqipërinë. Sfidat e Shqipërisë nuk janë të pasurojnë Ramën dhe një grusht njerëzish, por hapja e negociatave me BE-në.
