Kryetarja e LSI-së, Monika Kryemadhi i ka dalë në mbrojtje kryetarit të Bashkisë së Lezhës, Fran Frrokaj i cili u shoqërua në komisariat për abuzim me pronat. E ftuar në emisionin “Real Story”, Kryemadhi deklaroi se shoqërimi i Frrokajt në komisariat ishte selektiv.
Gjithashtu, Kryemadhi hodhi dritë dhe për shkaqet e vërteta të arrestimit. Ajo tha se arrestimet në Lezhë nuk janë për çështje korrupsioni, por është një pastrim territori për zgjedhjen lokale të vitit të ardhshëm.
“Nëse arrestimet e fundit do të jenë arrestime selektive, domethënë të një kahëshme, sigurisht që kjo e vë jashtëzakonisht në dilemë. Çështja e Lezhës nuk është çështje korrupsioni, është çështje pastrim territori për zgjedhjet lokale. Drejtësia e munguar për shqiptarët do të jetë një drejtësi që do të vonojë, por do të vijë një ditë. Sigurisht kostoja më e madhe nuk do të jetë e politikës, por për kamxhikun që ka mbajtur në dorë politika, siç janë në këtë rast disa segmente të drejtësisë shqiptare,” ka thënë Kryemadhi.
