Kryetarja e LSI, Monika Kryemadhi është kundër një karantine të dytë, por ka thënë se është pro mbylljes së shkollave pasi i cilëson si vatër të përhapjes së Covid-19.
Sipas saj, një mbyllje e dytë e vendit do ishte shkatërrimtare për ekonominë.
Kryemadhi beson se nëse karantiona mund të eleminohet nëse shtohen testimet.
“Mendoj që duhet të karantinojmë ata që janë të paaftë për të menaxhuar këtë situatë sot. Mendoj që karantina është një nga momentet për të cilat kërkon përpos një bashkëbisedim dhe angazhim total të gjithë njerëzve që dinë dhe kuptojnë nga situata ku jemi, mendoj se është e domosdoshme për të gjithë ne që të japim një zgjidhje kësaj. T’i japim një zgjidhje kësaj që po kalon Shqipëria. Jam kundër një karantinë të dytë, eleminohet totalisht nëse do kemi testime masive në gjithë popullatën.
Sot kemi një tender që është shpallur fitues i 13-ti për maskat nga ministria. Këto para mund të ishin marrë për tampona që të bëhej testim masiv i popullatës për të eleminuar një karantinë të dytë që do shkatërronin ekonominë shqiptare. Shkollat janë vatrat kryesore të shpërndarjes së Covidit, duhet të mbyllen. Këtë e them nga ana ime si biologe, në profesionin e parë, mungesa e ujit të ngrohtë, e sapunit, e dezinfektimit, e bën të pamundur menaxhimin”, tha Kryemadhi në ‘’Zonë e Lirë’’.
