Kryetarja e LSI-së, Monika Kryemadhi ka folur për mediat gjatë marshimit të saj drejt Kryeministrisë për t’iu bashkuar protestës së nëntë kombëtare të opozitës. Kryemadhi tha e prerë se zgjedhje më 30 qershor nuk ka, ndërsa heshtjen e ndërkombëtarëve e cilësoi si një mbështetje të madhe për shqiptarët.
E pyetur nëse ajo ka ndikuar në vendimet e Metës, Kryemadhi tha se ata nuk i kanë ndërhyrë asnjëherë njëri-tjetrit në karrierën politike, ndërsa duke iu referuar shkarkimit të presidentit, ajo tha se do ishte e lumtur nëse Meta do i rikthehej jetës normale.
Sa i takon nofkës “fallxhorë” vënë nga Rama, Kryemadhi tha se në fakt është kryeministri ai që beson në fall, madje shtoi se kryeministri ka punësuar fallxhorë në Kryeministri, ndërsa shtoi se vetë beson në Zot.
Një tjetër deklaratë e fortë është distancomi i Kryemadhit nga çdo incident në KZAZ-të.
Fjala e Kryemadhit:
Zgjedhje më 30 qershor nuk ka. Heshtja e ndërkombëtarëve është mbështetja më e madhe e tyre ndaj shqiptarëve. Dosjen 184 dhe 339 do e hetojë drejtësia, jo ajo e kapura por ajo për të cilën qytetarët po luftojnë. Nuk do e gjykojnë as Rama, as presidenti, as ndërkombëtarët. Jam shumë e lumtur nëse Meta do i kthehej jetës normale, por do të thoja që asnjëri nga ne nuk ka ndërhyrë tek njëri-tjetri sa i takon karrierës politike, pavarësisht se ne kësaj karriere i kemi marrë kostot dhe jo benefitet e tyre.
Njerëzit makthet e tyre që kanë nga rinia deri në fundin e karrierës politikë, i shprehin duke sharë. Nuk është kjo zgjidhja, zgjidhja është alternativa. Ka pjesëmarrje të madhe të vajzave dhe grave dhe kjo më jep shpresë se gjithçka është në rrugën e duhur. Këta njerëz nuk dalin sot as për Lulin, as për Monën, as për fallxhorën, as për Saliun. Dalin se duan drita, duan ujë, duan punë dhe drejtësi, shqiptarët janë lodhur dhe nuk dalin për politikë. Ky tranzicion do mbyllet me fundin e sektit të politikës.
Rama beson shumë në sektin e fallit, madje ka punësuar dhe fallxhorë në Kryeministri, dhe s’ka asgjë të keqe. Unë jam katolike dhe besoj në Zot, e si e tillë nuk besoj në fall. Ai nuk beson në Zot, por në fall dhe duket se e ka lexuar fundin e tij. Unë distancohem nga cdo përplasje dhe dhunë në KZAZ./ Tirana Today
