Kroacia beson se propozimet për shkëmbimin e territorit nuk janë të mira në kontekstin e stabilitetit në Evropën Juglindore, tha ministrja e Jashtme kroate Marija Pejçinoviç Buriç, në një koment mbi propozimin e Presidentit serb Aleksandar Vuçiç për një shkëmbim territori midis Serbisë dhe Kosovës.
Vuçiç ka folur kohët e fundit për idenë e shkëmbimit të veriut të Kosovës, që ka një popullsi me shumicë serbe, për pjesën e Serbisë jugore me një popullsi shumicë shqiptare në mënyrë që të dy vendet të mund të afrohen më shumë në zgjidhjen e mosmarrëveshjes së tyre.
Presidenti i Kosovës Hashim Thaçi ra dakord fillimisht me idenë, por në ditët e fundit ai ka tërhequr pjesërisht përkrahjen e tij për propozimin.
Ndërkohë, Shtetet e Bashkuara kanë thënë se do të pranojë një zgjidhje në të cilën të dyja palët bien dakord, ndërsa Gjermania dhe Austria kanë shprehur shqetësim lidhur me propozimet e tilla.
“Pozita e Kroacisë është se ngritja e çështjes së kufijve dhe shkëmbimeve territoriale nuk është një parim i mirë në aspektin e kontributit për stabilitetin në këtë pjesë të Evropës dhe më gjerë,” tha ministrja kroate Pejçinoviç Buriç, pas një takimi joformal të ministrave të jashtëm të Evropës Juglindore në Procesin e Bashkëpunimit Evropian (SEECP), i mbajtur në Banja Luka, në njësinë serbe boshnjake të Republika Srpska (RS).
Takimi u ndoq edhe nga ministri i Jashtëm serb Ivica Daçiç, ndërsa ministri i Jashtëm i Kosovës Behgjet Pacolli anuloi pjesëmarrjen e tij pasi Presidenti i Republikës Srpska RS, Milorad Dodik tha se ai ishte një person “non grata”(i padëshuruar) në atë qytet.
“Ngritja e çështjes së kufijve mund të zgjidhë një problem, por mund të shkaktojë shumë më tepër dhe prandaj jemi shumë të kujdesshëm në lidhje me zgjidhjet e mundshme që do ta kishin këtë si bazën e tyre, por nuk do të merrnin parasysh stabilitetin dhe sigurinë rajonale”, tha Pejçinoviç Buriç duke sqaruar se një shkëmbim territorial midis Serbisë dhe Kosovës mund të çojë në ngritjen e këtyre çështjeve edhe në pjesë të tjera të Evropës.
Tre ish-përfaqësues të lartë të bashkësisë ndërkombëtare në Bosnjë dhe Herzegovinë javën e kaluar paralajmëruan në një letër për Përfaqësuesen e Lartë të BE-së për Politikë të Jashtme dhe Siguri Federica Mogherini rreth rrezikut të shkëmbimit të territorit dhe pasojave të mundshme të saj për situatën në Maqedoni, Bosnje dhe Herzegovinë ose Ukrainë.
Në konferencën e Banja Lukës, Bosnja dhe Hercegovina paraqiti prioritetet e presidencës së saj të dytë të SEECP, një iniciativë e nisur në Sofje më 1996 me qëllim të forcimit të bashkëpunimit rajonal.
Prioriteti kryesor i presidencës së SEECP, është e njëjtë me moton “Lidhja më e mirë për një jetë më të mirë”, të cilën ka edhe Sllovenia e cila mori kryesinë në prill të këtij viti.
Duke përgëzuar Bosnjën dhe Hercegovinën për kryesimin e SEECP, Pejçinoviç Buriç tha se prioritetet e paraqitura ishin shumë të ngjashme me interesat e shumicës së vendeve të BE-së, nga të cilat pesë marrin pjesë në atë proces.
Anëtarët e SEECP janë Shqipëria, Bosnja dhe Hercegovina, Bullgaria, Kroacia, Greqia, Kosova, Maqedonia, Moldavia, Mali i Zi, Rumania, Serbia, Sllovenia dhe Turqia.
BURIMI: total-croatia-news.com
PËRSHTATI: TIRANA TODAY
