Ismail Morina është ndaluar që prej qershorit të vitit 2017 në kufirin e Malit të Zi me Kroacinë, pasi tentoi të kalonte pa dokumente. Për të kishte një urdhër arrest nga shteti serb, pasi Ballisti ishte i dyshuari kryesor për ngritjen e dronit në ndeshjen Serbi–Shqipëri, që ishte ndërprerë.
Familjarët e tij ishin të frikësuar mos Kroacia do të aprovonte ekstradimin e tij në Serbi, por sot ka ardhur edhe lajmi i madh nga ministrin kroat Boshnjakoviq. Është Behgjet Pacolli, zëvendëskryeministri i Kosovës dhe njëherësh ministri i Punëve të Jashtme që me anë të një postimi në Facebook ka konfirmuar që ekstradimi nuk do të ndodh.
“Jam shumë i lumtur të njoftoj për mos-ekstradimin e Ismail Morinës nga organet kroate. Për këtë i falënderoj miqtë tonë kroat, në veçanti ministrin Boshnjakoviq, i cili sot nënshkroi vendimin”, thuhet në njoftimin e Pacollit.
Morina ka pasur leje qëndrimi në Itali, por dokumentet e tij kanë qenë të konfiskuara nga autoritet italiane. Ndërkohë ministrja Serbe menjëherë pasi ka marrë lajmin ka dalë në qëndrim zyrtarë se do të kërkojë sërish ekstradimin nga Italia, pasi Ballisti aktualisht ndodhet në Itali ku ka edhe familjen.
Ndërsa në deklaratën e Gjykatës Supreme të Kroacisë thuhet: “Është vendosur që personi në fjalë të mos ekstradohet drejt Serbisë edhe pse janë plotësuar të gjitha kriteret e kërkuara. Pasi duke pasur parasysh marrëdhëniet mes dy vendeve, dënimi që mund të marrë Ismail Morina në Serbi mund të mos jetë i drejtë.”
