Presidenti i Venezuelës, Nikolas Maduro tha se ai ka mposhtur tentativën për grusht shteti të liderit të opozitës, Juan Guaido. Dhjetëra gardianë dolën në mbështetje të opozitës në përleshjet e së martës, ku u plagosën më shumë se 100 njerëz.
Por, në një deklaratë, Maduro tha se Guaido dështoi të kthente ushtrinë kundër tij. Nga ana tjetër, lideri i opozitës shprehet se Maduro ka humbur kontrollin ndaj forcave të armatosura. Guaido bëri thirrje për më shumë protesta të tjera në rrugë, raporton BBC.
Guaido është njohur si lider i përkohshëm i Venezuelës nga më shumë se 50 vende, duke përfshirë SHBA-në, Britaninë dhe shumë vende në Amerikën Latine. SHBA përsëriti mbështetjen për Guaido të mërkurën, teksa sekretari i shtetit Mike Pompeo, tha se “veprimi ushtarak është i mundur” nëse është i nevojshëm.
Por Maduro, mbështetur nga Rusia dhe Kina, ka refuzuar të dorëzojë pushtetin rivalit të tij. Në fjalimin e tij televiziv, të rrethuar nga komandantët ushtarakë, Maduro akuzoi protestuesit për “krime të rënda”, të cilat ai tha se nuk do të mbeteshin të pandëshkuar.
Si presidenti ashtu edhe Guaido u kanë bërë thirrje mbështetësve të tyre për të dalë në rrugë, duke krijuar më shumë trazira potenciale të dhunshme në një vend tashmë të bllokuar nga kriza ekonomike, ndërprerjet e energjisë dhe mungesat e ushqimeve./ Tirana Today
