Aleatët e NATO-s po vendosin forcat në gatishmëri, dhe po dërgojnë anije shtesë dhe avionë luftarakë në Evropën Lindore, tha organizata të hënën. Këto masa vijnë pas javësh tensionesh në rritje, pasi një grumbullim i trupave ruse pranë kufirit me Ukrainën shtoi frikën se Moska mund të planifikojë të nisë luftën.
“NATO do të vazhdojë të marrë të gjitha masat e nevojshme për të mbrojtur të gjithë aleatët, duke përfshirë përforcimin e pjesës lindore të Aleancës”, tha në një deklaratë të hënën Sekretari i Përgjithshëm i NATO-s, Jens Stoltenberg, duke përshëndetur kontributet shtesë të aleatëve në aleancën ushtarake.
“Ne gjithmonë do t’i përgjigjemi çdo përkeqësimi të mjedisit tonë të sigurisë, duke përfshirë forcimin e mbrojtjes sonë kolektive”, shtoi ai.
Kremlini mohon se po planifikon të sulmojë Ukrainën, dhe argumenton se mbështetja e NATO-s për vendin përbën një kërcënim në rritje në krahun perëndimor të Rusisë.
Ministri i Punëve të Jashtme të Letonisë, Edgars Rinkēvič, i ka bërë thirrje NATO-s që të adresojë ngritjen “e vazhdueshme” ushtarake ruse dhe bjelloruse në kufijtë e Ukrainës, me kundërmasa “të përshtatshme”.
Rinkēvičs shkroi të hënën në Twitter: “Ne po arrijmë në pikën ku ngritja e vazhdueshme ushtarake ruse dhe bjelloruse në Evropë, duhet të adresohet me kundërmasa të përshtatshme të NATO-s”.
“Është koha për të rritur praninë e forcave aleate në krahun lindor të Aleancës si masa mbrojtëse ashtu edhe parandaluese”, shtoi ministri.
Presidenti i SHBA-së, Joe Biden, diskutoi opsionet për forcimin e niveleve të trupave amerikane në Baltik dhe Evropën Lindore me zyrtarët e tij të lartë ushtarakë, gjatë një konferencë në Camp David të shtunën, sipas një zyrtari të lartë.
Të dielën, Departamenti i Shtetit i SHBA-së njoftoi se do të reduktonte nivelet e stafit në Ambasadën e SHBA-së në Kiev, Ukrainë, duke filluar me largimin e stafit jothelbësor dhe anëtarëve të familjes.
Burimi i lajmit: CNN. Përshtatur nga Tirana Today
