Pas skandalit diplomatik të rrjedhjeve të dokumenteve të fshehta, mësohet se ka dhënë dorëheqjen ambasadori i Britanisë në SHBA, Kim Darroch.
Me anë të një letre, ambasadori njofton se donte t’i jepte fund spekulimeve, duke shtuar se ‘rrjedhja’ e kishte bërë ‘të pamundur’ ushtrimin e punës së tij.
“Që nga rrjedhja e dokumenteve zyrtare nga kjo Ambasadë, ka pasur shumë spekulime rreth pozicionit tim dhe kohëzgjatjes së mandatit tim të mbetur si ambasador”, thuhej në letrën që Darroch i kishte dërguar Zyrës së Jashtme.
Zbulimi i disa komunikimeve konfidenciale që kritikonin presidentin amerikan Donald Trump si të paparashikueshëm dhe diplomatikisht të ngathtë, i kanë kushtuar postin ambasadorit të Britanisë së Madhe në SHBA.
Skandali prej ditësh kishte marrë vëmendjen politike të të dyja shteteve, dhe ambasadori Kim Darroch tha se ky presion ia kishte bërë të pamundur detyrën.
