Gjatë mbledhjes së sotme, Këshilli i Lartë i Prokurorisë ka vendosur hapjen e garës për 15 prokurorët, që do të jenë pjesë e SPAK, Strukturës së Posaçme Antikorrupsion. Gjatë mbledhjes në fjalë, nuk kanë muguar diskutimet lidhur me numrin e prokurorëve që do të jenë pjesë e kësaj strukture, të njohur ndryshe si Prokuroria Speciale. Unanimisht është vendosur për 15 prokurorë.
Ngritja e kësaj strukture është një nga prioritetet e KLP, këtij institucioni të ri të sistemit të drejtësise të krijuar së fundmi.
Aplikimi për vendet e 15 prokurorëve në SPAK mund të bëhet përmes faqes së internetit të Këshillit të lartë të Prokurorisë, ose përmes postës.
KLP vendosi 1 muaj afat për dorëzimin e dokumentacionit, për kandidatët prokurorë që duan te jenë pjesë e SPAK.
Prokurorët e SPAK duhet të jenë magjistratë me të paktën 10 vjet eksperiencë pune si prokuror, nuk duhet të kenë masë disiplinore, dhe të mos jenë anëtarë të KLP apo në këshilla drejtues në 3 vitet e fundit. Po ashtu ata duhet të jenë dakord për kontroll periodik të llogarive të tyre bankare, si dhe duhet të kenë pëlqimin nga familjarët për kontroll të llogarive bankare dhe komunikimeve telefonike.
