Sa i takon hetimeve të krimeve zgjedhore, kryeprokurori Olsian Çela ka paralajmëruar zhvillime të reja në ditët në vijim. Olsian Çela ka nisur një takim në Prokuroritë kryesore të vendit, ku këtë herë u ndal në Fier. Në një prononcim të shkurtër për mediat, ai është shprehur se ka pasur disa çështje të hetuara, ku e cilëson Prokurorinë e Fierit në nivele optimale. Sipas tij, e rëndësishme është të tregohet transparencë me publikun. Prokurori i Përgjithshëm, Olsian Çela, ka diskutuar për dy çështje kryesore, hetimin e krimeve zgjedhore dhe hetimet pasurore. Ai kërkoi nga prokurorët që të hetojnë shpejt, dhe në mënyrë të plotë të gjitha krimet zgjedhore.
“Qëllimi i vizitës lidhet me situatën e hetimit të krimeve zgjedhore, nga Prokuroria e Fierit. Janë disa takime që po bëhen në disa nga Prokuroritë kryesore në lidhje me krimet zgjedhore. Është e rëndësishme që të tregohet kujdes maksimal nga prokurorët, për hetimin e plotë e të shpejtë, si dhe për të siguruar transparencë ndaj publikut e medias. Ka pasur një numër të konsideruar çështjesh të hetuara, apo që është marrë tashmë një hetim. Besoj se shumë shpejt do të kemi rezultate, që do të bëhen të ditura publikut. Është e rëndësishme që nga ana e tyre të tregohet transparenca dhe të tregohet një qasje tjetër në raport me median dhe opinionin publik”, u shpreh Çela.
“Arsyeja e dytë ka të bëjë me hetimet pasurore dhe me evazionin fiskal, funksionimi i një seksioni të posaçëm që Prokuroria e Fierit ka për pastrimin e produkteve të veprës penale dhe evazionit fiskal. Ka rëndësi për rritje të efikasitetit për evazionin qoftë në drejtim të hetimit të parave, por dhe në raport me zbatimin e ligjit anti-mafia. Janë të rëndësishme rezultatet në këtë drejtim, pasi ka shumë kërkesa nga ndërkombëtarët për performancën dhe luftën ndaj pastrimit të parave, korrupsionin dhe krimin e organizuar”, përfundoi kryeprokurori.
