CEO i Tesla-s, Elon Musk, nuk pati një bisedë me presidentin rus Vladimir Putin përpara se të publikonte “planin e tij të paqes” për Ukrainën, tha të mërkurën zëdhënësi i Kremlinit, Dmitry Peskov.
“Jo, kjo nuk është e vërtetë”, u tha Peskov gazetarëve në një konferencë për shtyp, kur u pyet nëse Musk kishte biseduar me Putinin përpara se të publikonte postime në Twitter, në të cilat ai shprehte sugjerimet e tij për rezultatin e luftës së Rusisë ndaj Ukrainës.
“Plani i paqes Ukrainë-Rusi” i postuar në Twitter nga Musk javën e kaluar, pasqyronte kërkesat që zyrtarët e Kremlinit kanë bërë vazhdimisht në muajt e fundit, duke përfshirë që Kievi të angazhohet për neutralitet ushtarak, të pranojë se Krimea është formalisht pjesë e Rusisë dhe të sigurojë furnizim të vazhdueshëm me ujë në gadishull, aneksuar nga Moska në 2014.
Duke folur për CNN të martën, shkencëtari politik amerikan Ian Bremmer, president i firmës së konsulencës politike Eurasia Group, pretendoi se Musk i tha atij drejtpërdrejt për bisedën e tij me Putinin muajin e kaluar, të cilën Musk më vonë e mohoi.
“Kam folur me Putinin vetëm një herë dhe kjo ishte rreth 18 muaj më parë”, shkroi Musk të martën në Twitter. “Tema ishte hapësira”.
Të mërkurën Peskov konfirmoi se Putin kishte një bisedë telefonike me Musk “rreth një vit e gjysmë më parë”, por nuk pranoi të jepte ndonjë detaj.
Burimi i lajmit: CNN. Përshtatur nga Tirana Today
