Rreth 1.548 mjekë, 757 stomatologë, 510 farmacistë dhe 13.037 infermierë figurojnë pa kredite të regjistruara në Qendrën Kombëtare të Edukimit në Vazhdim, sipas raportit për vitin që lamë pas.
Viti 2016 ishte viti i dytë i programit katërvjeçar të certifikimit për mjekët, farmacistët dhe dentistët e punësuar në sektorin publik dhe atë privat të kujdesit shëndetësor.
Në këtë vit filloi edhe programi i detyrueshëm i certifikimit për infermierët, mamitë dhe ndihmës farmacistët.
Sipas këtij programi profesionistët e sipërpërmendur duhet të mbledhin një numër të caktuar kreditesh nga pjesëmarrja në aktivitete të edukimit në vazhdim, përkatësisht: 120 kredite për mjekët, 60 kredite për stomatologët dhe farmacistët gjatë periudhës 2015-2018, 40 kredite për infermierët, mamitë dhe ndihmësfarmacistët gjatë periudhës 2016-2019, shkruan Scan TV.
Numri mesatar i krediteve për profesionist për vitin 2016 është 23 kredite për mjek, 12 kredite për stomatolog, dhe 12 farmaciste duke tejkaluar kështu numrin e krediteve minimale të detyrueshme.
Numri total i krediteve të mbledhura ka shënuar një rritje të konsiderueshme krahasuar me një vit më parë. Në vitin 2016 janë marrë në total 333,160 kredite ose rreth 70 mijë kredite më shumë se një vit më parë.
