Pas heqjes së mandatit të dy deputetëve të LSI-së dhe PDIU-së, tashmë janë dy deputetë të rinj që do t’i zëvendësojnë ata në seancat parlamentare.
Kështu, në mbledhjen e sotme, KQZ u ka dhënë mandatin deputetëve që zëvendësojnë Gledjon Rehovicën dhe Aqif Rakipin, të cilëve iu hoq mandati në kuadër të ligjit të dekriminalizimit.
Komisioni Qendror i Zgjedhjeve ka vendosur që deputeti më i ri nga radhët e PDIU-së të jetë, Dritan Bici, ndërsa në vakancën e Rehovicës u zgjodh Silva Caka.
Kjo e fundit renditej pas Rehovicës në listën e qarkut të Beratit. KQZ i dha mandatin Cakës me 7 vota pro, asnjë kundër. Ky është mandati i dytë si deputete e Kuvendit të Shqipërisë për të.
