Komisioni Qendror i Zgjedhjeve ka rrëzuar kërkesën e Partisë Socialiste për shkarkimin Klement Zgurit. Maxhoranca kërkoi shkarkimin e Zgurit në lidhje me rastin e kryetarit të Bashkisë së Mallakastrës Agron Kapllanaj, duke mos thirrur mbledhjen e KQZ-së për mandatin e tij. Një ditë më parë socialistët nisën procedurat ligjore për shkarkimin e kreut të KQZ-së.
Ndërkohë është bërë publike një shkresë ku dëshmohet se Zguri ka njoftuar anëtarët e KQZ-së me kërkesën e Prokurorisë lidhur me kryebashkiakun e Mallkastrës. Shkresa hedh poshtë pretendimin e deputetëve socialistë se Zguri nuk i kishte vënë në dijeni mbi rastin anëtarët e tjerë të KQZ-së.
Lidhur me këto akuza, vetë kryetari i KQZ-së është shprehur se e vërteta është e kundërta e asaj që pretendohet nga Partia Socialiste. Sipas tij, Komisioni Qendror i Zgjedhjeve nuk fsheh asgjë, por në respekt të funksionit zyrtar që ai mbulon, e ka të ndaluar që të përfshihet në beteja apo lojëra politike.
Kujtojmë që Klement Zguri erdhi në krye të KQZ-së si pjesë e marrëveshjes parazgjedhore mes kryeministrit Edi Rama dhe kreut të opozitës Lulzim Basha.
