Prokurori i Prokurorisë së Përgjithshme Sokol Stojani u konfirmua në detyrë nga Komisioni i Pavarur i Kualifikimit pasi procesi i hetimit administrativ ndaj tij nuk gjeti probleme në asnjë prej kritereve.
Emri i prokurorit të suksesshëm Sokol Stojani u bë i njohur për median sepse ishte ai që hapi hetimet për dosjen e “Azem Hajdarit”. Gjatë karrierës së tij, Stojani ka treguar se ka aftësi të shkëlqyera profesionale dhe vlera të larta morale.
Gjatë ditës së sotme trupa gjykuese e përbërë nga Brunilda Bekteshi, Suela Zhegu dhe Valbona Sanxhaktari, bënë publik vendimin në favor të prokurorit Sokol Stojani, i cili u rivlerësua për të tre kriteret, atë të pasurisë, pastërtisë së figurës dhe aspektit profesional, ku rezultoi të kishte vlerësime pozitive.
Stojani e ka filluar karrierën në sistemin e drejtësisë në vitin 1994 dhe ka punuar për disa vite në Prokurorinë e Tiranës. Në vitin 2008, ai është emëruar prokuror në Prokurorinë e Përgjithshme dhe përgjatë 10 viteve të fundit ka mbajtur disa poste drejtuese, përfshirë edhe atë të anëtarit të Këshillit të Prokurorisë.
Në fillim të vitit, Stojani u emërua drejtor i Inspektimit, Burimeve Njerëzore dhe Mbrojtjes së Dëshmitarëve nga kryeprokurorja Arta Marku, detyrë të cilën e mbajti vetëm 9 muaj. Më 19 shtator, media rrodhi një urdhër lirimi nga pozicioni drejtues, ndërkohë që Stojani i tha BIRN se kishte dhënë dorëheqjen, pasi ndante “pikëpamje tjetër për mënyrën e drejtimit dhe të rekrutimit të burimeve njerëzore”.
Gjatë seancës dëgjimore të zhvilluar më datë 30 tetor 2018, komisioni konstatoi se Inspektorati i Lartë i Deklarimit dhe Kontrollit të Pasurisë dhe Konfliktit të Interesave (ILDKPKI) pati raportuar se subjekti i rivlerësimit kishte bërë deklarim të saktë, se kishte burime të mjaftueshme financiare për pasurinë e vet, se nuk kishte bërë fshehje të pasurisë apo deklarim të rremë dhe se nuk gjendej në kushtet e konfliktit të interesave.
Lidhur me pastërtinë e figurës, Drejtoria e Sigurimit të Informacionit të Klasifikuar ka dorëzuar pranë KPK një skedë të pastër duke e konsideruar të përshtatshëm për vijimin e detyrës. Po gjatë seancës dëgjimore, KPK raportoi se Stojani ka marrë vlerësimin shumë mirë gjatë periudhës së rivlerësimit dhe ndaj tij nuk ka pasur masë disiplinore.
