Kolegji i Posaçëm i Apelimit vendosi shkarkimin e ish-drejtuesen e Prokurorisë për Krime të Rënda, Donika Prela.
Vendimi u komunikua nga kryesuesja e seancës Natasha Mulaj.
Vetë Prela nuk ishte e pranishme në seancë.
Shkak për vendimin u bë pasuria e Prelës, e cila sipas KPA nuk është e justifikueshme.
“Si rrjedhojë vendimi i Komisionit datë 05.02.2019 duhet ndryshuar pasi nuk gjendet i drejtë dhe i bazuar në fakte, prova dhe ligje. Për këtë arsye trupi gjykues vendosi ndryshimin e vendimit të KPK për Donika Prelën,dhe shkarkimin e saj nga detyra. Vendimi është përfundimtar dhe ka efekt të menjëhershëm”, deklaroi Natasha Mulaj.
Konluzionet e KPA
KPA arriti në përfundimet e mëposhtme: Lidhur me pasurinë, apartament banimi me sipërfaqe 95.6 metra katrorë në rrugën “Bajram Curri” në Tiranë rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë.
Në lidhje me pasurinë likuiditete në shumën 4,501,427.89 lekë rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë.
Lidhur me transaksionin huadhënës në shumën 25 mijë euro Kolegji arriti në konkluzionin se kjo shumë është pasuri e subjektit të rivlerësimit dhe personit të lidhur me të.
Për këtë pasuri rezultoi se ka mungesë të burimit financiar të ligjshëm për të justifikuar krijimin e saj dhe është kryer fshehje pasurie.
Bazuar në përfundimet e mësipërme Kolegji arrin në konkluzionin se subjekti i rivlerësimit Donika Prela ka kryer deklarim të pasaktë dhe të pamjaftueshëm të pasurisë së saj dhe personave të lidhur me të.
