Më herët, kryeministri grek Alexis Tsipras tha se me dhimbje në zemër pranoi dorëheqjen e ministrit të Jashtëm, Nikos Kotzias. Pavarësisht këtij vendimi të vështirë, duket se ai nuk do ta lërë me kaq.
Mediat bëjnë me dije se në datën 22 tetor, Kotzias do të mbajë një fjalim të fortë. Duke iu referuar mediave greke, ato shkruajnë se deklaratat e tij në këtë fjalim mund të provokojnë një tërmet politik.
Ai do të flasë jo vetëm për marrëveshjen e emrit me Maqedoninë, por edhe për çështjet e lëna pezull me Shqipërinë.
Me një deklaratë televizive për mediet, kryeministri grek Alexis Tsipras, pohoi se pranoi dorëheqjen e ministrit të Jashtëm, Nikos Kotzias.
“Vendosa që të marr Ministrinë e Jashtme në këtë moment, por edhe përgjegjësinë. Duke dhënë njëkohësisht një mesazh se kjo zgjedhje është një opsion që sinjalizon vendosmërinë time për të bërë çdo gjë që kam në duar. Për të siguruar përfundimin me sukses të marrëveshjes historike të Prespës, që përmirëson rolin ndërkombëtar të vendit”, tha Alexis Tsipras.
Burime pranë zyrës së kryeministrit grek theksojnë se asgjë nuk do të ndryshojë në politikën e jashtme greke, e sidomos arritjet e bëra në lidhje me fqinjët. Marrëveshja e Prespës, dhe paketa e çështjeve me Shqipërinë.
Kotzias ka dhënë dorëheqjen pas disa debateve të ashpra me ministrin Kammenos, i cili kishte paraqitur në SHBA një plan të dytë, në rast të dështimit të marrëveshjes së Prespës. Kur kjo çështje është shtruar në mbledhjen e kabinetit, kryeministri Tsipras, për të mos krijuar përçarje me partnerin qeveritar, ka ndarë përgjegjësinë e konfliktit midis dy ministrave. Ky ka qenë shkaku që kreu i diplomacisë greke ka dhënë dorëheqjen.
