Partia Demokratike e Kosovës (PDK), e njohur si partia e Hashim Thaçit dhe Aleanca për Ardhmërinë e Kosovës e drejtuar prej Ramush Haradinajt, janë pjesë në të njëjtin koalicion në zgjedhjet e 11 qershorit, raporton RTK.
Kjo u bë e ditur në një konferencë të jashtëzakonshme mbrëmë në selinë e AAK-së nga këshilltari për mediat i kësaj partie, Muharrem Nitaj.
Pa dhënë detaje për mënyrën se si u shkua drejt kësaj marrëveshje të papritur, Nitaj tha: “Pa asnjë dyshim koalicioni që kemi arritur sot do të jetë koalicion fitues i zgjedhjeve”.
Sipas tij, edhe numri i deputetëve do të jetë i barabartë, 55 do t’i ketë PDK kurse 55 do t’i kenë AAK dhe NISMA.
Pas konkretizimit të marrëveshjes, Ahmet Isufi, nënkryetar i AAK-së u shpreh se, “Është momenti i duhur që kryeministër i Kosovës të jetë Ramush Haradinaj. Prandaj është zgjidhja e duhur për zhvillimet e reja që na presin”.
Pjesë e këtij koalicioni janë edhe dy forcat e tjera politike, Partia Social-Demokrate e Kosovës dhe Balli Kombëtar i Kosovës.
