Ditën e sotme, Komisioni i Ri për Shënjimin e Kufirit me Malin e Zi i ka dërguar Qeverisë raportin final për të gjeturat rreth çështjes së Demarkacionit.
Ky komision i drejtuar nga Shpejtim Bulliqi bën të ditur se raporti në fjalë do të jetë i saktë dhe i argumentueshëm dhe se këto të gjetura do të jenë bazë se si të veprojë më tutje qeveria lidhur me këtë çështje.
Kreu i Komisionit Bulliqi ka vlerësuar se puna e ish-komisionit ka qenë me të meta thelbësore që kanë determinuar me këto përfundime.
“Nga të dhënat vihet në përfundim dhe konstatohet se nuk ju është kushtuar vëmendje hartave të mëhershme edhe pse të njëjtat e kanë pasur të kufizuar vijën administrative. Vija e caktuar kufitare me Malin e Zi më 26 gusht 2015 nuk është e saktë”, ka thënë Bulliqi.
Sipas tij, ky komision ka tejkaluar kompetencat e tij duke e përcaktuar një vijë të re kufitare pa një marrëveshje paraprake dhe se ai komision ka punuar pa asnjë platformë.
Bulliqi shtoi se ish-komisioni e ka pranuar si të mirëqenë mungesën e mbulueshmërisë së territorit me harta kadastrale dhe i ka lënë ato në duar të palës malazeze.
