Kosovë: Besnik Tahiri emërohet ministër në detyrë i Punëve të Jashtme

Kryeministri në detyrë i Kosovës, Avdullah Hoti ka emëruar Besnik Tahirin ministër në detyrë të Ministrisë së Punëve të Jashtme dhe Diasporës.

Tahiri deri më tani ka mbajtur pozitën e zëvendëskryeministrit të parë në Kosovë.

Ky vendim vjen pas njoftimit të bërë nga Meliza Haradinaj-Stublla për dorëheqje nga pozita e ministres, ditën e sotme.

Përveç pozitës në ministri, ajo ka dhënë dorëheqje edhe nga të gjitha funksionet në partinë Aleanca për Ardhmërinë e Kosovës.

Dorëheqja e Haradinajt vjen pas publikimit të një video-incizimi në media, ku pretendohet se burri i saj, Dardan Stublla, ka blerë votat për partinë e saj.