Kosova ka treguar se ka një ekip mjaft të fortë dhe shumë shpejt pritet që të jetë në një kompeticion të rëndësishëm. “Vëllazërorja” e zhvilluar në Zvicër mesh kuqezinjve dhe Dardanëve është fituar nga këta të fundit me rezultatin e pastër 3-0. Edhe pse ishte një miqësore kombëtarja shqiptare tregoi se nuk është kurrkund dhe ka akoma mjaft punë për të bërë nëse kërkon të ketë sukses në Ligën e Kombeve.
Panuçi zgjedhi të hedhë fushë që nga minuta e parë dy debutuesit Ndoji dhe Guri, ndërsa Kosova aktivizoi në këtë sfidë me një formacion sulmues. Në minutën e katërt, paraqitet rasti i parë i rrezikshëm, Aliti depërton bukur në krahun e djathtë ndaj Likës, por krosimi i tij në brendësi të zonës largohet nga Gjimshiti. Dhjetë minuta më vonë, shpërthen Rashica në krahun e djathtë dhe provon me një harkim drejt zonës, por nuk arrin Murriqi.
Më pas, Frederik Veseli bën një gabim trashanik në mesfushë dhe i jep mundësinë Dionis Avdiajt të dalë i vetëm përballë Bershës, por portieri kuqezi ka bërë të pamundurën, duke i mohuar golin Kosovës.
Në minutën e 20-të, Arbër Zeneli kalon në avantazh të tijtë. Një tjetër gabim i mbrojtjes kuqezi, e cila çahet lehtësisht në qendër. Shqipëria bën dy zëvendësime pa u mbyllur pjesa e parë, largohet Qaka në fushë Manaj. Largohen edhe Roshi, në fushë Sabjen Lilaj.
Ndryshon skema, bëhet 4-3-3. Pjesa e parë në Zyrih u mbyll, Shqipëri-Kosovë 0-1. Në minutën e gjashtë të pjesës së dytë, Kosova shënon sërish. Përsëri me Arbër Zeneli.
Një tjetër gabim tragjik në mbrojtje, por edhe ekzekutim perfekt i mesfushorit kosovar. 20 minuta para fundit, Shqipëria u fundos. Gabim fatal në mbrojtjes, Zhegrova shënon me anë të një krosimi që nuk e prek askush dhe Berisha mbetet i palëvizur.
Teksa Kosova i shkoi shumë pranë golit të katërt me anë të Arbër Zeneli, Shqipëria bëri golin e parë në kuadrat në minutën e 77-të me anë të Bekim Balaj. Pesë minuta më vonë provoi edhe Kristal Abazaj, por edhe tentativa e futbollist debutues përfundoi në duart e Ujkanit. Ndeshja u mbyll me një shtyllë të Kosovës.
