Ministri i Jashtëm i Serbisë, Ivica Daçiç ka komentuar deklaratën e Albin Kurtit, teksa u shpreh se nuk dëshiron që Aleksandar Vuçiç të jetë në tryezën e bisedimeve për dialogun Kosovë-Serbi.
Sipas Daçiç, kjo tregon se Kosova nuk është e interesuar për vazhdimin e dialogut dhe për arritjen e një kompromisi.
“Nëse ata (Kosova), vazhdojnë kështu, ne nuk jemi optimistë kur bëhet fjalë për vazhdimin e dialogut midis Beogradit dhe Prishtinës”, deklaroi Daçiç.
Ndër të tjera, “RTS.rs” shkruan se Daçiç duke marrë shkas nga veprimet dhe aktet e njëanshme të Prishtinës, sipas tij, Kosova është faktori më i madh i paqëndrueshmërisë.
“Ky është një tregues se ata nuk kujdesen për dialogun dhe kompromisin. Problemi i vetëm është se ata nuk e kuptojnë se situata ka ndryshuar shumë”, tha ministri serb. Ndërsa shton se pozicioni i politikës së jashtme të Serbisë ka ndryshuar dhe është përmirësuar kohët e fundit.
