Kosova vendosi sot që të ndalojë importin e vezëve nga Maqedonia e Veriut.
Shoqata e Shpendarive të Kosovës ka ngritur alarmin për rrezikun e konsumimit të vezëve që importohen nga MV.
Sipas saj, MV pas shfaqjes së murtajës tek shpendët, ka eksportuar vezë me sëmundje në Kosovë.
Shoqata në fjalë u ka bërë thirrje të gjithë konsumatorëve që të kenë kujdes gjatë blerjes së vezëve.
Lidhur me këtë, zëdhënësi i Agjencisë së Ushqimit dhe Veterinës, Lamir Thaçi në një prononcim për “Telegrafin” theksoi se është ndaluar përkohësisht importi i shpendëve dhe vezëve nga Maqedonia e Veriut.
“Pas lajmërimit të publikuar në faqen zyrtare të autoritetit Maqedonisë së Veriut të Ushqimit dhe Veterinarisë ka të bëjë me detektimin e sëmundjes New Castle Disase.
(Murtaja tipike e shpezëve) tek dy ferma brojlerë (ferma të pulave për therje mish) dhe sipas raportit të publikuar nga Organizata Ndërkombëtare për Sëmundjet e Kafshëve – OIE, është raportuar se në Republikën e Maqedonisë Veriore kemi pasur dy shpërthime në dy lokacione të ndryshme të sëmundjes Mortaja Atipike e Pulave.
Sipas Ligjit të Veterinarisë AUV është e obliguar që të bëjë ndalesën e importit nga shtetet e infektuara me sëmundje të kafshëve ose shpezëve, sipas programit të parë të sëmundjeve infektive të dala nga ky Ligj”, u shpreh Thaçi.
